石岡上

【文、圖／鍾榮富／南臺科技大學應用英語系講座教授】

 

　　「石岡上」在高樹東片三四公里个所在，頭擺係馬卡道平埔族个大本營，近山，多砂石，水源不足，漫天生草，又無出入个大路。可能野生動物越來越少，打獵、耕種都不容易，平埔族慢慢个向南遷到阿八產地區，同其他个族群合做一大部落。平埔族留下來一大片个砂石地，泥肉成分低，耕種不容易。日本時代末期，物資缺乏，為了提升耕作面積，為了開發荖濃溪支流石岡溪，就鼓勵大路關人搬去開墾。當時大路關已經開發啊差無多，人口忒多，絡食艱難，故所有二十零戶搬到該去，日本政府配給每一戶一甲兩分地。客人從來食苦同食飯共樣，開砂石、作埤圳，樣樣都敢做，項項都壁。無幾久，本來全部砂石个河霸寮，就漸漸个有田有埔，家家戶戶屋前都有青綠綠个農作物。

　　同砂石地貶出來个大石頭，堆啊一泥就係，後來生活穩定以後，慢慢个改用石頭做成伙房个圍牆。故所早時入去莊頭，到位使得看著石頭，大路關本地人就佮伊安到「石岡上」，表示大粒个石頭堆啊像石岡共樣。但係當地人為了紀念大路關，自家人喊到「大路關寮」(左圖)。今下屬於「建興村」个一部份。

　　建興村另外一部份係河洛人，人口同客人差無多。但係客人過早搬去，就在庄中央設了伯公。本來係一粒大石頭，後來慢慢个就在石頭頂上刻了「福德正神」等字，正式有了精神寄託。伯公如今已經建廟，雖然毋會特別大，但係對庄上人个精神撫慰盡有幫助。因為有學老人个關係，石岡上个伯公無像其他客人地區个伯公，最明顯个差別係廟裡背供拜个伯公，造型像學老人个土地公，桌頂上雕龍畫鳳(右圖)。客人个伯公單淨一塊石碑，係有起廟桌頂淨係伯公像，無其他神，也無雕龍畫鳳。

　　石岡上个客閩兩族群相處和諧，這可以從廟上个完福祭典看出來。一般來講，客閩每年輪流做爐主，係學老人做爐主，請神祈福用學老話，祭拜个牲體、排法、儀式等等完全由學老人發落，客人跈著祭拜。係輪到客人做爐主，請神祭祖用客話，其他祭品採買、排桌、敬香等等儀式，全部按照客人个傳統。兩個族群，兩種話，平和相處，故所庄上大部人都會兩種話，瞭解兩種祭典風俗。



　　
（四縣腔） 鍾榮富教授 聲檔 － 石岡上





　

▲BACK